Hamaikakoak
Hamaika lagunek osatu zuten Euskaraldiaren lehen hamaikakoa, modu pertsonalean eta borondatez Euskaraldian, 11 egun euskaraz ekimenean, parte hartzea erabaki zuten hamaika lagunek.
Euskal Herriko lehen hamaikakoa osatzen zuten kideek euskararen aktibazioa bultzatzeko urratsa eman zuten. Ekimenaren enbaxadore izan ziren, eta herritarren parte hartzea aktibatzeko lehen deia egin zuten. Ingurukoei ekimenaren berri emateko proposamen luzatu zitzaien, gainera.
Euskal Herriko hamaikako orokorraz gain, herriz herri eta entitatez entitate ere ehunka hamaikako sortu ziren. Eta Euskaraldian parte hartuko zuten ahobizi eta belarriprest guztiei gonbitea egiten zitzaien nork bere hamaikakoa osatu zezan, hizkuntza ohiturak aldatzeko aliatu izango zituzten hamaika lagunen zerrenda osa zezan partaide bakoitzak.
2018ko Euskal Herriko hamaikako kideak
Cris Lizarraga · Pedro Miguel Etxenike · Alex Txikon · La Basu · Aretz Igiñiz · Zuriñe Gil · Arianne Unamuno · Mikel Arrasate · Eneko Sagardoy · Dani Alvarez · Toti Martinez de Lezea
Dani Alvarez
Radio Euskadiko esataria da Alvarez, astelehenetik ostiralera Boulevard saioa gidatzen du goizetan. Telebistan ere zuzendu izan ditu saioak, Paco Etxeberriarekin batera egindako “El lector de huesos” saioa, adibidez.
Etengabeko Euskaraldia bizi dut nik: ahalegin handia egiten dut euskara ikasteko eta gozatzeko.
Gustura gainera!
La Basu
90. hamarkadan hasi zen rapeatzen etxebarritarra. Garai hartan neska bakarra bazen ere, urte batzuk geroago, emakumezkoen talde bat eratzea lortu zuen: Jungla Urbana. 2001ean #k maketa kaleratu zuen. 2013an Remixes eta 2015ean Aire es vida diskak argitaratu zituen. 2016ean, berriz, euskara hutsezko lehen EPa atera zuen: Izotz erregina.
Bapatean rapeatzen konturatu nintzen ez zegoela emakumerik rapeatzen euskaraz eta esan nuen:
aizu, hau aldatu egin behar da! Hizkuntza errekuperatu eta disko bat euskara hutsean
kaleratu behar dut!
Mikel Arrasate
Atarrabiako Karrikaluze euskaldunen topaguneko zuzendaritzakide eta boluntarioa. 1998 urtean sortutakoa da Karrikaluze elkartea, eta sortzaileen taldekoa izan zen Mikel. Gaur egun Euskaltzaleen Topaguneko Zuzendaritza Batzordeko kide ere bada. Ogibidez okina da.
Euskaraz hitz egiteko ditudan aukera guztiak baliatzen ditut
Pedro Miguel Etxenike
Pedro Miguel Etxenike Izaban jaio zen, Nafarroan. Munduko zientzialari esanguratsuenetakoa da, eta horren erakusle Europako Fisika Elkarteko ohorezko kide izendatu berri dutela 2018an. Nafarroako Unibertsitatean lizentziatu zen eta Fisikan Doktorea da Cambridgeko unibertsitatean eta Bartzelonako Unibertsitate Autonomoan. Euskal komunitate zientifikoaren Inguma datu-basean, berak idatzitako euskarazko 15 lan baino gehiago azaltzen dira. Donostiako International Physics Centerreko zuzendaria da gaur egun.
Euskarak hizlariak behar ditu, eta hizlariak ez ezik, sortzaileak ere behar ditu
Zuriñe Gil
Gasteizko Geu elkarteko eragilea. Mintzalagun egitasmoaren ardura izan du Zuriñek azken urteotan eta gaur egun bertako Euskaraldiko batzorde eragilean ari da buru-belarri. Geu elkartea 1992 urtetik ari da Gasteizko euskaltzaleak trinkotu eta euskararen erabilera sustatzeko helburuarekin lanean.
Euskarak ni egin nau pertsona moduan eta uste dut gizarte ere egiten gaituela, baina era berean, guk
ere euskara egiten dugu
Aretz Igiñiz
Aretz Igiñiz (Hendaia) lapurtar errugbilaria da, harroin moduan aritzen da Aviron Bayonnais taldean. Jokalari modura lortu zuen 2016 urtean Baionako taldea Top 14 kategoriara bueltatzea. Euskal selekzioarekin ere jokatu izan du. 2015 urtean adibidez, Korrika Baionatik pasatzen zela eta, Euskal Herriko selekzioarekin partida jokatu zuen selekzio bretoiaren aurka.
Euskaraz bizi naiz txikitatik, euskara da nire ama hizkuntza eta ahal dudan momentu guztietan euskaraz
ari naiz
Cris Lizarraga
Cris Lizarraga Bilbon jaio zen eta Arte Ederrak ikasi zuen bertan. Belako taldeko abeslaria eta teklista da 2011 urtean taldea sortu zutenetik. Ordutik hona, jaialdi garrantzitsuenetan hartu dute parte: FIB, Arenal Sound, Jazzpana, Sonorama… Bi disko kaleratu dituzte orain arte: Eurie (2013) eta Hamen (2016)
Me gusta que la otra persona mantenga el euskera hasta dónde yo pueda llegar
Toti Martinez de Lezea
Gasteizen sortu zen Toti Martinez de Lezea, eta urte askoz itzulpengintzan jardun ostean idazteari eskaini zizkion ordu guztiak. La calle de la Judería, Las torres de Sancho, La Herbolera, Señor de la guerra, Los hijos de Ogaiz, La Brecha eta NURen nobelak dira, beharbada, Martinez de Lezearen argitalpen ezagunenak. Hala ere, idazteaz gain, antzerkigintzan ere aritu da Toti Martinez de Lezea, musika taldeetan ere ikusi dezakegu, eta kantuentzat hitzak idatzi edo ballet eta bideoentzat gidoiak ere egiten ditu.
Ulertzeko arazoa daukagunean, gaztelaniara pasatzen gara
Eneko Sagardoy
Goya saria irabazi du 2018an bertan Durangoko aktoreak Handia filmean egindako lanagatik. Horretaz gain, Errementari (2018), Cuando dejes de quererme (2018) edo Amaren eskuak (2012) filmeetan hartu du parte. Antzerkian ere hamaika lan egindakoa da Sagardoy, eta Goenkaleko aktore izan zen 2012tik 2013ra bitartean.
Arnasteak hizkuntza bat balu niretzat euskara litzateke
Alex Txikon
Lemoan jaio zen Alex Txikon, eta alpinista izateaz gain aizkolaria eta BASE jauzilaria ere bada. Bere azken zortzi-milako igoera 2016ko neguan izan zen Nanga Parbat-era (8.126m), Kinshofer bidetik. Aurretik Lhotse, Sisha Pangma edo Gasherbrum mendiak ere igo ditu. Munduko 14 gailur altuenetik 12 igo ditu.
Gure gurasoak kanpotarrak dira eta gu bigarren belaunaldikoak gara: neba arrebetean erdiak daki baina
lobetan denak. Hor ikusten da goraka doala erabilera!
Arianne Unamuno
Soraluzeko Pil-pilean Euskaltzaleon Elkarteko koordinatzailea. Komunikabideak, haur eta gazte aisialdia, erabilera bultzatzeko egitasmoak eta kulturgintza lantzen dituzte elkartean. Ariannek ardura ezberdinak izan ditu elkartean lehenago ere. Kantaria ere bada zenbait musika proiektutan.
Euskara nire ama hizkuntza da: euskaraz gozatzen dut, euskaraz sentitzen dut, euskaraz komunikatzen
naiz, euskaraz sortzen dut
Herrietako eta entitateetako hamaikakoak
