Bizipenak
2022an, 15 egunetako ariketan, egunez egun hainbat herritarrek bizi izan dituzten esperientzien bilduma duzu hemen. Herritarrek idatziz utzitakoak batzuk, besteak, berriz, bideo bidez jaso ditugunak.
PARTE-HARTZAILEEN BIZIPENAK BIDEOAN
PARTE-HARTZAILEEK IDATZITAKOAK
Ondo dago gure hizkuntza ohiturei buruzko hausnarketa egiteko.
Sorkunde (Lemoa)
Pello Errotako eskola-komunitatea Euskaraldian murgildu da azaroaren 18tik abenduaren 2a bitartean. Aurtengo Euskaraldian ARIGUNEA izan gara, euskaraz aritzeko gunea, alegia. Euskaraldia hitzak 11 hizki ditu. Gelaka banatu dira hizkiak eta baita jangela eta Guraso Elkarteari ere. Egunero, azaroak 18tik abenduaren 2ra, patio garaian, zegokion hizkia atera dugu portxera eta horman itsatsi. Zegokion taldeari beste guztiok pasiloa egin diogu eta pasatzean txaloak eskaini dizkiegu. Momentu hunkigarriak bizitu ditugu. Gaurkoan, abenduak 2, EUSKARALDIA hitza osorik taularatu dugu euskararen eguneko ospakizunean.
Pello Errota Herri Ikastetxea (Asteasu)Egia esan, beti saiatzen naiz ahobizi modura ibiltzen. Hala ere, Euskaraldia baliagarria izan zait bi "erdi-euskaldunekin" euskaraz gehiago egiteko ohitura indartzeko, batarekin hitz eginda belarriprest zelako, bestearekin zuzenean aipatu gabe.
Beste maila bateko bizipena:
Nazka-nazka eginda nago euskararen erabilpenari buruzko albiste etsigarriak behin eta berriz entzuten. Izan ere, errealitatea jakin behar dugu, baina zaurian alferrikako minik ematea ez da ona.
Horregatik, eskertzekoak dira zuen mezu baikorrak eta eskatzen dizuet aurrerapenak ozen-ozen zabaltzea, txikiak badira ere.
Santakarako eskolan lan egiten dut (Nafarroako erriberako herri bat). Oso zaila da herrian euskara entzutea eta eskolan, euskara klasetik kanpo ere. Euskaraldian euskararekiko ohiturak aldatzen saiatu gara.
Euskaraldia hasi baino lehen ikasle bakoitzak bere erronkak idatzi zituen, haien artean:
- LEHENENGO HITZA EUSKARAZ
- Txikiekin euskaraz hitz egin
- Patioan euskaraz hitz egin
- Korridorean euskaraz hitz egin
- Euskara dakiten 4 irakaslerekin euskaraz hitz egin
Behin rolak aukeratuta eskolan ahobizi ala belarriprest logoak margotu zituzten eta txapak egin genituen.
Egunero patioko orduan musika euskaraz jartzen genuen.
Bizipen polita izan da, zoragarria delako ikasleek euskaraz hitz egiteko egiten duten ahalegina ikustea.
Hori guztia kontuan hartuta A eredukoak direla eta gurasoek euskara ez dakitela.
