Euskara ulertzen duten hiztunen arteko hizkuntza ohiturak aldatzeko ariketa soziala da Euskaraldia, gizartearen gune guztietara zabaldua eta denborari dagokionez mugatua. Euskaraldiaren helburu nagusia herritarren hizkuntza ohiturak aldatuta euskararen erabilera handitzea da. 2020an, azaroaren 20tik abenduaren 4ra egingo dugu ariketa eta aurten, norbanako bezala (ahobizi edo belarriprest izanez), parte hartzeko aukeraz gain, taldean parte hartzeko aukera ere izango dugu arigune–en bidez.

Ehundaka arigunek eman dute izena Euskaraldian

Aurtengo Euskaraldiak berritasun bat dakar berarekin: ariketa taldean egin ahal izateko aukera. Aukera hori ariguneen bidez gorpuzten da; hau da, euskaraz lasaia aritzeko guneetan. Eta gune horiek Euskal Herriko txoko guztietan topatuko ditugu azaroaren 20tik abenduaren 4ra. Izan ere, ehundaka izan dira ariguneak sortu edo identifikatu eta Euskaraldian parte hartzea erabaki duten elkarteak, taldeak, erakundeak, enpresak… Modu horretan, hainbat eta hainbat ahobizi eta belarriprestek euskaraz lasai aritu ahal izango dute mota eta tamaina guztietako entitateen baitan. Entitateek izena emateko epea irailaren 27an bukatu zen. Zure herrian ariguneak non topatuko daitezkeen jakin nahi? HEMEN duzu begiratzeko aukera!